電玩吹兩嘴:《天堂》又「M」到!?

作者:Cora 發表日期:2017-11-11 13:02:25

由韓國NCSoft開發的《天堂M》,早前宣布由遊戲橘子成功取得台版經營權,隨即於上月10日舉行預先登錄活動,短時間內即突破80萬登記大關,上月尾更大搞「預先創角」活動,等玩家提早設計屬於自己的角色。不過台版遊戲未開波,韓版已快人一步,再嚟「M」到!講緊嘅係本周二NCSoft在首爾舉行發表會,宣布明年推出《天堂2M》呀!

據講《天堂M》在今年短時間內取得廣大玩家愛戴,營收成績理想,加速了廠商NCSoft對《天堂2M》的開發進度,呢款被譽為明年最期待的MMORPG手遊,遊戲內容將會以PC版《天堂2》進行大幅改編和移植,從釋出的片頭動畫可見,畫面質素比《天堂M》仲要高,同場睇埋發表會現場實機示範片段流出,短短幾十秒的戰鬥畫面經已相當高質!只係如今台版《天堂M》連營運服務都未開始,何況要等《天堂2M》於港台地區登場,真係唔知要等到幾時呀!如果要搶先玩,睇嚟電‧競女要學好啲韓文Download元祖《天堂2M》先得。

同樣係本周新鮮滾熱辣釋出,日本代表Square Enix都有一款《Final Fantasy XV Pocket Edition》手遊,宣布將於今年秋季推出。叫得做「口袋版」,作品顧名思義就係可以將《FF XV》遊戲內容完全濃縮到手機身上,仲要角色變晒做Q版,戰鬥演出即刻萌爆。只係遊戲並非一般免費下載,道具課金玩法,而係除了第一章免費收錄外,其餘9章都要逐次付費購買,呢種DLC玩法唔知大家又受唔受呢?

講完兩款未上市手遊,話題一轉電‧競女同大家介紹番一款日本地區剛上市嘅《言靈勇者》啦。正所謂「唔怕生壞命,最怕改壞名」,呢款遊戲就用咗一個好特別的「姓名邏輯」,當玩家輸入不同角色名字時就會產生不同角色職業,並以這些角色組隊打怪物。最過癮係當玩家輸入特定名字時更會產生相應職業,例如改名「織田信長」會變武士、「一休」變僧侶、「蘭斯洛特」變騎士,甚至改名做「巴哈姆特」就會變成飛龍,係咪搞鬼先!至於遊戲性都係舊世代點陣圖的表現手法,只係電‧競女擔心大家最終只會玩開頭「刷角色」而已呢。


本文来源:http://hk.on.cc/hk/bkn/cnt/lifestyle/20171111/bkn-20171111123519684-1111_00982_001.html