金屋藏嬌 韋斯摩根出軌三年衰收尾

作者:Icey 發表日期:2017-09-10 21:03:02

英超出名多賤男,近期除咗朗尼出事之外,連「狐狸隊長」韋斯摩根都瀨嘢,加入「終極賤Man」行列!呢位李斯特城隊長,雖然仲未結婚,但已經同未婚妻識咗14年,仲有一對囝囝,仲紋咗兩個仔名字上身,成個好男人咁款。但原來佢於倫敦金屋藏嬌,同27歲性感小三搞埋3年,依家小三個肚已經籮咁大,正印啱啱先知個死佬嘅惡行,二話不說將佢趕出豪宅,呢段關係睇怕都凍過水。

韋斯摩根今年33歲,雖然於英國出世,但就代表牙買加國家隊,分別係李斯特城同牙買加嘅主力,16年就帶領狐狸創下奇迹,勇奪英超冠軍。韋斯摩根件頭大大份,但身上有兩個囝囝名字嘅紋身,人情人後都係愛妻號,但原來內裡係終極賤男。英國傳媒踢爆,3年前佢於夜店結識愛爾蘭女孩Karla,之後火速撻着;佢同未婚妻及囝囝於諾丁漢居住,所以就安排小三搬去倫敦,實行金屋藏嬌,英媒透露每逢李斯特城作客倫敦球會,韋斯摩根都會去小三屋企過夜。

韋斯摩根未婚妻Sheneen今年33歲,係個女強人,咁多年嚟都好信任未婚夫,一直都冇懷疑韋斯摩根出面有女人。而小三就27歲,雖然知道對象有家庭,但佢不嬲唔介意,仲不時於社交網放閃,話身邊男人好錫佢,並透露過有人送飛畀自己,入場去支持李斯特城。本身韋斯摩根做齊人雙安無事,但小三身邊人睇唔過眼,打畀Sheneen知發生咩事,Sheneen當然嬲到震,將隻死佬踢出門口,未來真係有排搞。


本文来源:http://hk.on.cc/hk/bkn/cnt/sport/20170910/bkn-20170910192754527-0910_00882_001.html